تفتكر السكة واحدة؟

-هي..لقت هو عايز يتكلم..وهي كمان كانت عايزة تفهم.. بدات الماضي..عشان هو يكمله..كان بيحكي..وهي جواها بتكلمه هو قالها عمل ايه امبارح..وهي ردت جواها..باللي بتعمله كل يوم..ياللي شاهد عالزمن..تفتكر ان السكة فعلا واحدة؟ولا كل واحد منهم في سكة ؟ولا ميكس..كل واحد في سكة وهيتقابلوا مقابلة شنيعة في الاخر؟..اخليلكوا الاجابة؟ولا اخليها للزمن؟
:)

امبارح..وانا بعمل نسكافيه..
تخيلتها..
حلوة و امورة..
رسمتلها كده صورة..
و عيونها الزُرق..مقفولة..
وانا بطًَبق هدومي بالليل..
افتكرتها..و سرحت كده..
و قلت ياه..ده لسه بيعزها..
ياتري..لسًّه بتحبك..زي مابتحبها؟
امبارح..انا عملت حاجات كتير..
وشِعر و غُني و كام صورة..
اصلي متخيلاها أ ُسطُورة..
محدش يقدر يوْصلها..
عايز تقولها ايه؟..قللي انا
يمكن..ترتاح..وأغفر لها

كتبت امبارح
وكل اما اكتب سطر..امسحه
اصل مش عايز حروفي يجرحوا
واللي جوايا ولا الف سطر..يشرحوا
كتبت امبارح..وكل اما اكتب سطر..امسحه

امبارح ..جيت اكتبلك جواب..
ماتنقلش القلم من مطرحه..
وافتكرتك اما قٌلتْ:
"اصل مش عايز حروفي يجرحوا"
والحروف ياعيني..
ماتعرفش اللي بيكتب...
ولا بأي شكل تفرحه..
تصدق؟..حروفك مابيعرفوش..
الا يجرحوا..

قطعت ورقي و جبت لوحة
ورسمت حبة شبابيك مفتوحة
وعينيك طالة من كل شباك فيهم
وانا من جوا قلبي بناديهم
وكل اما اقفل شباك
رموش عيونك تفتحه
و كل اما ارسم خط..امسحه
رسمت امبارح..
وكل اما ارسم خط..امسحه

امبارح..
سبت الحروف..وجبت الجِيتارة..
قلت انغامها..احلي من العِبَارة
"يا حبيبي و العيون سود.."
اتكسر من زمان ده العود..
والصباع..علي الوتر..بيحركه
اتقطع الوتر..والصباع..
كَلُه الدٌود..
يوم ماتْخَطت الحدود..
والضحك والبكا عندي اتحرًّفوا
تصدق؟..اغانيك مابيعرفوش..
الا يجرحوا..

لا عارف اكتب..
ولا عارف ارسم لوح
من غير عيونك..قلبي كأنه شبح
اصل انتي ريشتي..وانتي قلمي
وانتي البحور الزرق اللي قلبي فيهم سبح
كتبت اسمك امبارح
والله..كل اما اكتب حرف
الاقيه قصادي اتمسح

رميت الاغاني..وجبت الريشة والالوان
قلت الالوان بتفهم في الحنان..
الورق الابيض مافيش..
رغم ان المواجع مابتترسمش عالورق
إلا إن اللوحة كانت سودة!..
كان قصدي ارسم قلب فاضي..
وجيتار مكسورة..
اوتار الجيتارة زرقا..والنغم اصفر
ولو في العمر اكتر..
هالاقيك جوايا تاني..بلون احمر!
والزرع كان اخضر..
والوردي..ده كان لون العصفورة
واحلامي والذكري..اللي يدْبحوا
تصدق؟..لٌوَحَك مابيعرفوش..
الا يجرحوا..

بكل كلمة ليه انا سألت
طول عمري فرحان بلون عينيكي
بس اما شفتك بين شبابيكي..اتخدت
قبل منها بحبة انا كنت باسأل فينك
لقيت عينيكي مفتوحين شاقة ضلام ليلك
وورق بسيط اتفرد..بين عيوني و بينك
رسم حكاية ولد..ماعشقش غير عينيك
قلبي الوليد اتقبض..اما ده شاف عينك

اه ه
و رجعت اسال سؤالي
لا انا اتجاهلت
ولا ده كان حالي
ولا عيونك بألف لون اتلونت
زرقا..ومن زمان من نني قلبي اتمكنت
و سكنت جوا جوايا
و جوه لوحي و الحكاية
من بدايتها بتتطبع علي الورق
والنهاية ماتسرقتش..ولا قلبي اتسرق
لا كرهت في يوم بحورك ولا قلبي رافض الغرق
انا بس خفت
ده نورك..بره شبابيكه برق
و كل اللي كتبته و قلمي و اللوح..اتحرق

خلي الجراح..بتونسني
لما تكون مش موجود..بتحسسني
انك مفروض..
هيجي يوم..
تعرفني..
لا هتتجاهل ولا هتخاف..
ولا هتسأل مرة ليه..والف تقول حاضر
وهتطلع من البحور الزرقا..وتعود
من الماضي الغادر..

انا..انا عمري ماتجاهلت..
انا بكل كلمة ليه سألت
مانجيب مراية
ونشوف..
اللي هيحس فينا بخوف
يبقي هو اللي مسجون
انا عمري ماغلط في العيون
دي بحورها حافظها موجة موجة
ولا ساعات بتاخدك الهوجة؟
مش قلبي اللي يمشي مع الهوجة..

Frozen love
We2am

اللوحة:صلاح طاهر

عنـــــدّية

انا مش قادرة افهم؟....ايه اللي بيضايقك لما تقول او تسمع الكلام ده!!!!


الّلي فيكي اصله فيا
واللّي على جبينك
مكتوب من زمن في عينيا
والفرق بيني وبينك
ان انتي عنـــدّية


انا للحياة من بدري بسلّم
وتدوس عليّا كتير….لكني ما اتكلم
وابيع امل للغير….وعمري ما اتعلم
وانشر بذور الخير….وانا اللي متالم



انا لما بحب بتوّلد من جديد
بنسى الدنيا والماضي البعيد
واعيش على قد عمري ما يقدر يزيد


كارمن يا غجرية؟؟؟!!.... انا بنت مصرية
وعينيك دي مصرية

وانا لما احب.....بتسجن وبسور حديد
بلّفه حـــــــــــــــــواليّا
انا اصلي غيرك..اصل انتي عنديّة


طول عمري عندية

بخاف على طيري
لا يلوف على غيري
لكنّي عمري ما احبسه
جوّه اراضيّا

والله عندية

الحب عندي هواية ... غيّة

يمكن انا عاشق...زيك لنور حرية
يمكن انا سارق..من الدنيا خطاويّه
لكين ماهوش فارق…والسور ده حواليّا

والعند لو عندي…انط برة السور
وينط من بعدي…اللي عليه الدور
ممكن يكون ودّي..ويمكن يكون النور
ياللّي بنيت سدّي…..انا قلبي ليه مكسور؟

قلبك ماهوش مكسور….يمكن يكون ماسوور
عطشان لحبّة نووور
وانا عندي حنّية
تهد اي سووور
وتغطي كل النور
وتيجي خطاويك…..تلامس خطاويّا
ونغني سوا اغنية


غنيلي يا صبية
مات الكلام في عينيا
غنيلي يا صبية

هنغني سوا اغنية
نغزل خيوط الليل

نعملها كوفية

تدفي ليلنا الطويل
وتطلع شمسنا ديّة

غنّي معايا وقووول

غنيلي يا صبية
خدي راسي على حجرك
وغني ليّا شوية
مشتاق انا لفجرك
والحزن ده فيّا


يا حبيبي والعيون السووود
وطابع الحسن عالخدوود
صوتك..ودقة ايديك عالعود
وعودك نباهي بيه الفل والعووود

غنيلي يا صبية
عدّي أيد يكي في شعري
وصحّي الحنين فيّا

ودنيتي في العينين السود
والحنين ده ليّا
ياللّي انت مغروس فيّا

مين اللي بدّر الحب
ولا كانش في النيّة
يكون ده الشبّ

لدي الصبية

صوتك ماهوش مكسور…
يمكن صحيح ماسور
وبراحه في عينيا

دي مشيئة إلهية
ضميني يا صبية
برداااااااان

يا حبيبي!!!...بردان…سقعان
كان فين ده كله من زماااان



خبيته ورا القضبان
ورا سور بنيته بايديا
دفيني يا صبية

غنيلي طب اغنية

فيها ليل وعوود
وحاجات كتير فيّا
يمكن اعوود
ويعود امل ليّاااااا

ساكته ليه..ما تغني
غنّي يا عنــــــــدّية

* ملحوظة: اللوحة تجسد كارمن وانا المرة دي اللي مختارها ومرّتب...قلت هو يريح هي شوية عشان ماتشتكيش...تعاون بقى ...بس يا رب اختياري يعجبكم زي اختيارات وئام الجميلة*

frozen love

-----------

we2am

ان ماشلتكش الارض..

ان ماشلتكش الارض
نشيلك في حضننا
وتمشي في العروق
بداله دمنا

ليه مبتعديش؟
ده فاضي قلبنا
عايز اللي يجي..يقعد
ما يطاطيش

ولا ينحنيش
و اللي يجي ...هايعيش

ان ماشلتكش الارض
نشيلك في حضننا


حاسك لسة جواكي كلام؟
اه لسة
جوايا كلام يهزنا
لو قلناه...مبنقولوش

خايفين يغرنا:

كلامنا عمره ما اتقال
بيوصل للشفايف
ويتحبس في الحال
من القلب خارج خايف
ومعاه اكبر سؤال!!

بيخرج من قلوبنا ولا بنقولوش
ومع كلامنا دوبننا..ولا عدناهوش

لسه كلامها كلامنا
و الكل زينا..مننا

ان ماشلتكش الارض
نشيلك في حضننا

خليك معانا...في حلمنا
الترعة..والساقية..والبيت القديم في الغيط
خليك جنبنا
كلامنا اصله بسيط
بيشيل همومنا وذلنا

بنحبك ...ايوه مبنخبيش

ليه مبتعديش؟
ده فاضي قلبنا
عايز اللي يجي..يقعد
ويعيييش


فرحك فرحنا
وحزنك حزننا

ان ماشلتكش الارض
نشيلك في حضننا


ماتخافش
الساقية مبتقفش
بتدوووور
والرحاية مبتسكتش
بتثوووووووور
بتطحن همنا
وبتكسر حزننا
والغم ده ... يغووور

والشمس؟
الشمس اصل النور
بتشق قلب الغيم
وبيتنا القديم
احلى من بيتنا ده
والشارع المجروح
وكلامي وكل ده
بيغسل ساعات الروح
وانت وانا
واحنا كلنا

ان ماشلتكش الارض
نشيلك في حضننا

لا...لا تروح
لسة في القوس الوان
ولسة في حضن الام...امان
ولساك يا انسان...انساااان

والحكاوي القديمة...حتة مننا
والكون براح..مفتوح لنا
انت..وانا
واحنا كلنا

جرب
وان ماشلتكش الارض
نشيلك في حضننا

we2am

frozen love

اللوحة:محمد صبري

الشارع اللي جارحنا..

الشارع بتاعنا
بقي مليان عماير
و كل واحدة فيهم
جرح غاير
لا العماير بتداوي
ولا الجراح بتتهد


و الشجر في شارعنا
صبره فاق الحد
مجروح بجرحنا
و مغروس في حينا
من قبل ما يتسد
بدي العماير
اللي جرحها غاير

و الحب سد
و الكره سد

و ايام اللقا
علي الصوابع بتتعد

عديني.....بامدلك ايدي بحب وورد
بصي في عيني....انا دمعي صار مالي الخد

الشارع ده كل يوم انا بامشي فيه
الشارع ده كل يوم..بيقتل حد
و ابص للعماير.. ماليها السوال!!!

بس المرة دي..لقيت في قلبي رد
انا لسه انسان..محتاج لحد
انسان... و جوه منه حاجات
ساعات اهاااااات
و ساعات كتير الود
عديني....بس المرة دي

احضن ايديا بجد!

احضن ايديا بجد

احضن ايديا وطير
نعدي اي سد
ونفك قلب الاسير
ويفوق أملنا الحد
لا حاجة تخنق روحنا
ولا حاجة كاسرة اليد


الشارع بتاعنا
انا وانت..قبل اي حد

ولو كنا لبعض؟!!

هنعدي... ولا يفرق في شارعنا بعد
هنداوي العماير...اللي جرحها غاير
والجرح ده...ينهد
والمرة دي...صدقني..
هاحضن ايدك بجد
دي ايام اللقا
يدوب...يدوب..يدووووب.. تنعد

WE2AM

M.H.R

اللوحة للرائعة زينب السجيني